I möcht wieder emol e Lausbue sei,
Und meine Schulfreund wäre dabei.
Da däd i mit ihne Indianerlis spiele,
und mit'eme Pfeil nach de Spatze ziele.
I möcht wieder ooreife Äpfel esse,
Am AB drauße Karl-May Biicher läse,
Und in der Küche d'Schüssle ausschlägge,
De Großmudder ihr Gebiß verstegge.
Bei allem Blödsinn wär i debei.
I möcht wieder emol e Lausbue sei.
I möcht wieder emol baarfuß laufe
Und mir für zehn Pfennig Bäredregg kaufe.
Uf's Nachbars Baum drowwe Kirsche stänze,
In der Schul de Onterricht schwänze.
I möcht mi widder am Necker rumdrigge,
Im Damebad durch d'Aschtlöcher spigge.
I möcht e mol wieder d'hoose verreiße.
I möcht emol wieder ins Bett nei sch...pringe.
Bei allem Blödsinn wär i debei,
I möcht wieder emol e Lausbue sei.
I möcht' emol wieder mit Roßbolle schmeiße,
De Maiekäfer de Kopf naa beiße,
De Katz vo unserer Tante hinte
E Luftballon an de Schwanz na binde.
I möcht zu meim Bäsle "Lumbedier" sage,
I möcht e're wieder de Leib verschlage,
De ganz G'schichtsunderricht verhunze
Und im Herr Lehrer in Hut nei br...
Bei allem Blödsinn wär i debei.
I möcht wieder emol e Lausbue sei.
I möcht emol wieder im Räge rumwaade,
Und meine Fieß im Gilleloch baade,
D'Schlissellöcher an unserer Schulhausdiire
Inne und auße mit Leim verschmiere.
Mei weiß Matrose-Bliesle aaziege
Und domit in frische Kuhdreck neifliege.
De Nochbers Fritz an de Leffel fasse,
Z'erscht hoochheebe un no blotze lasse,
Oder es könnt au en andere sei.
Do wär i als Lausbue wieder debei.
Eins aber - da dürft ihr mi net auslache:
Eins möcht i als Lausbueb doch nimmer mache:
Mei Mueder, die möcht i nimmer so plooge,
Do wär i gwiss nimme oogezoge:
Ich däd ihre helfe ihr Wäsch ufhänge,
Ich däd ihr die Kohle vom Keller raufbrenge,
Un wenn sie was saage däd, no däd i sprenge.
Am Geburtsdag möcht i si au beschäre,
Do däd ich eifach mei Sparbichsle läre,
Nunder zum Apotheker laufe
Und für fuffzich Pfennig e Handcrem kaufe.
Un frogt si mi naa:"Für wen isch denn das, Kind?"
No sag i: "Für deine abg'schaffte Händ."
Komm, Mamma, jetz wolle mer's glei probiere".
No däd ich ihr d'Händ mit Hautcrem eischmiere.
Und deshalb! Nicht wäge dem Blödsinn allei
Möcht'i emol wieder e Lausbue sei.
| |
|
