Im Sunntaablatt hat vorchi Wuch scheen fett gedruckt der Titel gstann: E' "Christlich-soziale Weltansicht soll haben jeder Mann." Der Franz hat sich de Kop verbroch, er hat's nit ganz verstann. 's is doch e' Schand, denkt er bei sich, daß ich des nit verstehe kann. Er geht schnurstracks zum Schwurle Hans, der hat schun alles abgelees. Wann's jemand weeß, was es bedeut', der Schwurle Hans, der weeß's. Der Hans hat grad die Pherdt getränkt un saat: "Es is e' leichti Sach: Es git doch Ansichtskarte gnung, mit dene wär's aa abgemach." E' Ansicht es e' Bild, e' Landschaft, wie mer's nennt, un raffscht die Bilder alli zamm, noo hascht die ganzi Welt." Der Franz war nit ganz inverstann un geht zum Vetter Guß; er denkt sich: froge is ke Schand, un glaawe is ke Muß. Der Vetter saat: "Ich glaab der's schun, daß du's nit hascht verstann. E' Ansicht is e' Meenung, weescht; e' jeder Mensch kann welchi hann.

Doch is die Sach nit gar so leicht, mer weeß nit, wer se hat; er muß dr' saae, weescht? Er muß dr's saae akkurat. Er brauch Kuraschi, hascht verstann? Un Muskle wie e' Pherdt, nit jeder kann's vertraae, wann er e' Meenung heert." "Do hat bei uns", saat jetz der Franz, "e' Weltansicht der Raki Sepp, der hat unlängscht mit 'm Teufel graast un hat ne nausgschmiß aus seim Bett." "Loß, sinn", saat druf der Vetter Guß, "wer weeß, wie's zugang is! Der Sepp hat sicher viel getrunk un hat geträämt gewiß. Der Maies Jossep, Franz! Wann der sei Meenung saat, do git's glei Krüppel, Toodi; do waxt ke Gras, wu der hinschlaat. Doch merk dr's Franz, mir sin e' Deutschi Gmeen Ansichte git's bei uns wie Fleh. Sei Meenung saat e' jeder raus un tut's aa anri noch so weh. Der Deutschi saat sei Meenung, Franz, er duckt sich nit so wie e' gschlaaner Hund. Die Hauptsach is die Meenung, Franz, geht aa derweil es Land zugrund."

| Deutsche Volkslieder | Ahnenforschung | Ferienaufenthalt | Folksongs | Hymns | Genealogy | Pacific Holiday | HOME PAGE | Suche | Email |